Мемлекет басшысының халықты сапалы ауызсумен қамтамасыз ету жөніндегі тапсырмаларын орындау мақсатында ауданда жүйелі жұмыстар атқарылуда. Соның ішінде Есет батыр ауылында қолға алынған ауызсу жүйесін кеңейту және қайта жаңғырту жобасының маңызы зор. Аталған жоба ауыл тұрғындарының тұрмыс сапасын арттыруға, сумен жабдықтау жүйесінің тұрақтылығын қамтамасыз етуге және инженерлік инфрақұрылымның тозуын төмендетуге бағытталған.
Қазіргі таңда жобаның екінші кезеңі аясында бірқатар құрылыс-монтаж жұмыстары жүргізілуде. Ауызсу желілерін жаңарту, ескірген құбырларды ауыстыру, жаңа желілерді тарту және су беру жүйесінің тиімділігін арттыру бойынша жұмыстар кезең-кезеңімен жүзеге асырылып жатыр. Бұл жұмыстардың нәтижесінде ауыл тұрғындары сапалы әрі үздіксіз ауызсуға қол жеткізеді деп күтілуде.
Жобаны жүзеге асырып жатқан мердігер мекеме – «Бақ Береке-2030» жауапкершілігі шектеулі серіктестігі. Құрылыс алаңында қажетті техника мен жұмыс күші жұмылдырылған. Аудан әкімі жұмыс барысымен танысу кезінде мердігер мекеме басшылығына құрылыс сапасына ерекше көңіл бөлу қажеттігін ескертті.
– Ауызсу – халықтың өмір сүру сапасын айқындайтын негізгі факторлардың бірі. Сондықтан бұл бағыттағы жұмыстардың сапалы әрі уақытылы орындалуы аса маңызды. Әрбір құрылыс нормасы мен техникалық талап толық сақталуы керек. Тұрғындардың игілігі үшін жүзеге асырылып жатқан жобалардың нәтижесі нақты әрі сапалы болуы қажет, – деді аудан әкімі.
Сапар барысында ауылішілік аяқсу жүйесінің жағдайы да назарға алынды. Аяқсу арналары ауыл тұрғындарының бау-бақша және үй іргесіндегі егін шаруашылығын дамытуда маңызды рөл атқарады. Осыған байланысты аудан басшысы аяқсу жүйелерінің өткізу қабілетін арттыру, су арналарының тазалығын сақтау және олардың тұрақты жұмысын қамтамасыз ету мәселелеріне тоқталды.
Жауапты сала мамандары ауылдағы аяқсу арналарының қазіргі ахуалы жөнінде баяндама жасап, алдағы кезеңге жоспарланған жұмыстарды таныстырды. Өз кезегінде аудан әкімі анықталған кемшіліктерді жою, су арналарына тұрақты мониторинг жүргізу және тұрғындардың өтініштері мен ұсыныстарын назарда ұстау қажеттігін атап өтті.
Бүгінде Жалағаш ауданында халықтың өмір сүру сапасын жақсартуға бағытталған инфрақұрылымдық жобалар кезең-кезеңімен жүзеге асырылуда. Ауызсу, аяқсу, жол және коммуналдық шаруашылық салаларындағы жұмыстар аудан басшылығының тұрақты бақылауында. Бұл бағыттағы жобалар тұрғындардың тұрмыс жағдайын жақсартып қана қоймай, ауылдық елді мекендердің әлеуметтік-экономикалық дамуына да оң әсерін тигізуде.
Жалпы, Есет батыр ауылында атқарылып жатқан жұмыстар елді мекеннің инженерлік инфрақұрылымын жаңғыртуға және тұрғындарды сапалы коммуналдық қызметтермен қамтамасыз етуге бағытталған маңызды жобалардың бірі болып табылады. Алдағы уақытта да бұл жұмыстар жүйелі түрде жалғасып, ауыл халқының игілігіне қызмет ететін болады.
