Қызметтік әдеп – мемлекеттік қызметшінің жұмыс барысында ұстанатын моральдық және этикалық қағидаларының жиынтығы. Мемлекеттік қызметші әрдайым адалдық, әділдік, қарапайымдылық және жауапкершілік қағидаларын басшылыққа алуы тиіс. Сонымен қатар, азаматтармен қарым-қатынаста сыпайылық танытып, өзінің қызметтік міндеттерін сапалы әрі заң аясында орындауы қажет.
Қазақстан Республикасының мемлекеттік қызмет саласындағы заңнамасына сәйкес, мемлекеттік қызметшілерге қызметтік өкілеттіктерін жеке мақсатта пайдалануға, сыйақы алуға, мүдделер қақтығысына жол беруге және қызметтік беделіне нұқсан келтіретін әрекеттер жасауға тыйым салынады. Бұл талаптар мемлекеттік қызметтің ашықтығы мен әділдігін қамтамасыз етуге бағытталған.
Сыбайлас жемқорлық – қоғамның дамуына кері әсерін тигізетін қауіпті құбылыс. Ол мемлекет пен халық арасындағы сенімді әлсіретіп, заң үстемдігі қағидаттарына нұқсан келтіреді. Сондықтан сыбайлас жемқорлыққа қарсы іс-қимыл – әрбір мемлекеттік қызметшінің негізгі міндеттерінің бірі.
Сыбайлас жемқорлықтың алдын алу мақсатында мемлекеттік органдарда тұрақты түрде түсіндіру жұмыстары жүргізіліп, әдеп нормаларын сақтау мәселелері кеңінен насихатталады. Қызметкерлер арасында құқықтық сауаттылықты арттыру, ашықтық пен әділдік қағидаттарын қалыптастыру – жемқорлықтың алдын алудың маңызды тетігі болып табылады.
Мемлекеттік қызметші қандай жағдайда да халық мүддесін бірінші орынға қоюы тиіс. Әдеп нормаларын сақтау мен сыбайлас жемқорлыққа қарсы мәдениетті қалыптастыру – мемлекеттік қызметтің сапасын арттырып қана қоймай, қоғам сенімін нығайтудың негізгі кепілі.
Қызылорда облысы бойынша Ішкі мемлекеттік аудит департаменті басшысының орынбасары, әдеп жөніндегі уәкілі М.Умербаева.
