Бүгінде аудан диқандары көктемгі науқанға белсенді кірісіп, жер жырту, тұқым себу және суару жүйелерін ретке келтіру жұмыстарын кезең-кезеңімен атқаруда. Мамандардың айтуынша, биыл егіс көлемін ұлғайту арқылы тұрғындарды сапалы әрі қолжетімді ауыл шаруашылығы өнімдерімен қамтамасыз ету көзделіп отыр.
2026 жылы аудан бойынша азық-түлік қауіпсіздігін қамтамасыз ету, әлеуметтік маңызы бар азық-түлік өнімдерінің импортын азайту және жергілікті өнім көлемін арттыру мақсатында ауқымды жұмыстар қолға алынған. Осы бағытта 235 гектар жерге картоп, 2545 гектарға бақша дақылдары және 2250 гектар алқапқа көкөніс дақылдарын егу жоспарланған. Қазіргі таңда бұл жұмыстар кезең-кезеңімен жүзеге асырылып, бірқатар шаруашылықтар егіс жұмыстарын бастап кеткен.
Аудан шаруалары егіс алқаптарында заманауи агротехникалық әдістерді пайдаланып, өнімділікті арттыруға басымдық беруде. Сонымен қатар, тұқым сапасы, минералды тыңайтқыштарды тиімді қолдану және су үнемдеу технологияларын енгізу мәселелері де назардан тыс қалмаған.
Сала мамандары тарапынан егіс жұмыстарының сапасына тұрақты бақылау жүргізілуде. Бұл өз кезегінде мол өнім алуға және ішкі нарықты жергілікті өніммен қамтуға мүмкіндік береді. Сонымен қатар, ауыл шаруашылығы құрылымдарына қажетті әдістемелік және техникалық қолдау көрсету шаралары да ұйымдастырылуда.
Жалпы, Шиелі ауданында көктемгі дала жұмыстарының уақытылы әрі сапалы жүргізілуі ауыл шаруашылығы саласының дамуына оң серпін беріп, өңірдің экономикалық әлеуетін арттыруға ықпал етпек. Аталған жұмыстар алдағы уақытта да тұрақты бақылауда болып, жоспарға сәйкес жалғасатын болады.
@Шиелі ауданы әкімінің баспасөз қызметі.
