Кездесу барысында қазіргі таңда өндіріс, құрылыс, коммуналдық шаруашылық, көлік, энергетика және қызмет көрсету салаларында жұмысшы мамандарға сұраныстың жылдан-жылға артып келе жатқаны атап өтілді. Осыған байланысты техникалық және кәсіптік білім беру жүйесін еңбек нарығының нақты қажеттілігіне бейімдеу, оқу орындары мен жұмыс берушілер арасындағы байланысты күшейту және кадр даярлау сапасын арттыру басты міндеттердің бірі ретінде айқындалды.
Шаһар басшысы Нұржан Ахатов бүгінгі күні маман даярлау жүйесі жаңа талаптарға сай жаңғыртылып, нақты кәсіпорындардың сұранысына негізделуі тиіс екенін айтты.
– Біз жұмысты ең алдымен оқу орындары үшін емес, кәсіпорындарға қажетті мамандарды даярлау қағидатына көшіруіміз керек. Қазір қаладағы техникалық және кәсіптік білім беру ұйымдарында жұмысшы кадрларды даярлау бағытында мақсатты жұмыстар атқарылуда. Бірақ бүгінгі талап – қай мамандыққа қанша кадр қажет, оны қай кәсіпорын жұмысқа алады және оқу бітіргеннен кейін қанша түлек өз мамандығы бойынша жұмысқа орналасады деген сұрақтарға нақты жауап беру. Сондықтан бұл бағыттағы жұмыстар жүйелі түрде ұйымдастырылуы қажет, – деді Нұржан Сәбитұлы.
Жиында кадр даярлау ісіне заманауи цифрлық шешімдерді енгізудің маңыздылығы да атап өтілді. Атап айтқанда, еңбек нарығындағы сұранысты деректер негізінде талдайтын цифрлық платформаларды пайдалану, кәсіпорындардың маманға деген қажеттілігін электронды форматта қалыптастыру, оқу орындарының білім беру бағдарламаларын осы мәліметтермен үйлестіру және түлектердің жұмыспен қамтылуын цифрлық мониторинг арқылы бақылау мәселелері назарға алынды. Мұндай тәсіл еңбек нарығының өзгерістеріне жедел ден қоюға және маман даярлау тиімділігін арттыруға мүмкіндік береді.
Сонымен қатар жауапты сала басшыларына жұмыс берушілермен өзара іс-қимылды күшейту, өндірістік тәжірибе алаңдарын кеңейту, дуальды оқыту жүйесін дамыту және еңбек нарығына қажетті мамандықтар бойынша мемлекеттік тапсырысты нақты сұранысқа сәйкес жоспарлау жөнінде тапсырмалар берілді.
Мәжіліс қорытындысында күн тәртібінен тыс өзге де маңызды мәселелер қаралып, қаладағы әлеуметтік-экономикалық даму көрсеткіштерін жақсарту, мемлекеттік қызметтердің тиімділігін арттыру және басқару процестерін цифрландыру бағытындағы жұмыстарды жандандыру жөнінде жауапты сала жетекшілеріне нақты міндеттер жүктелді.
