Іс-шараның басты мақсаты – оқушыларға мамандық таңдауда дұрыс бағыт-бағдар беру, олардың қызығушылықтары мен қабілеттеріне сәйкес кәсіп иесі болуға ынталандыру. Кездесу барысында шақырылған қонақтар өздерінің еңбек жолы, кәсіби тәжірибесі және таңдаған мамандықтарының ерекшеліктері туралы кеңінен әңгімелеп, қатысушылармен ашық диалог құрды.
Атап айтқанда, Шиелі ауданының мәдениет және тілдерді дамыту бөлімінің бас маманы Қасымов Жантас, Шиелі аудандық «Өскен өңір» газетінің тілшісі Мейіржан Ибрагимов және зейнеткер Сармантаев Алмас әрқайсысы өз саласының қыр-сырымен бөлісіп, мамандық таңдаудағы маңызды факторларға тоқталды. Олар оқушыларға еңбекқорлық, табандылық және үздіксіз ізденістің маңызын атап өтіп, болашаққа сеніммен қарауға шақырды.
Кездесу барысында оқушылар көкейлеріндегі сұрақтарын қойып, мамандардан нақты әрі пайдалы кеңестер алды. Әсіресе, қазіргі заман талабына сай мамандықтар, еңбек нарығындағы сұраныс және жеке қабілетті дамыту жолдары туралы айтылған пікірлер жастар үшін ерекше маңызды болды.
Шараны музейдің ғылыми қызметкері Әбутегі Бекболат жүргізіп, жиынның мазмұнды әрі тартымды өтуіне ықпал етті.
Мазмұнды кездесудің нәтижесінде оқушылар өз болашағына бейжай қарамай, саналы түрде мамандық таңдаудың маңызын терең түсінді. Мұндай тағылымды шаралар жас ұрпақтың кәсіби бағдарын айқындап қана қоймай, олардың өмірлік мақсаттарын нақтылауға да үлкен септігін тигізеді.
