Мәжілістен кейін аудан басшысы арнайы жиын өткізіп, күн тәртібіндегі және өзге де бірқатар маңызды мәселелерге байланысты тиісті сала басшыларына нақты тапсырмалар жүктеді.
Жиында аудан әкімі алдымен аймақ басшысының мәжілісте берген тапсырмаларына сәйкес, экономика салаларына жасанды интеллект енгізу мәселесіне тоқталды. Цифрландыру мен заманауи технологияларды қолдану – уақыт талабы екенін атап өтіп, инвестициялық жобаларды іске асыру барысында цифрлық шешімдерге басымдық беру, өндірістік процестерді автоматтандыру, ауыл шаруашылығында заманауи технологияларды енгізу бағытында жұмыстарды күшейту бойынша барлық сала басшыларына нақты міндеттер жүктеді.
Мұнан бөлек, аудан бюджетінің орындалу барысына тоқталып, бірқатар бөлімдер мен ауылдық округтерде қаржы игеру қарқыны төмен екені сынға алды. Бюджет қаражатын тиімді әрі уақытылы игеру – басты міндет екені қатаң ескерткен аудан әкімі жергілікті бюджет түсімдерін арттыру, оның ішінде кәсіпкерлік нысандардың табысына талдау жасау, «Туған жерге тағзым» акциясын ұйымдастыру және меценаттарды тарту мәселелері бойынша жауапты сала басшыларына қатаң тапсырмалар берді.
Күн тәртібінде көктемгі әскерге шақыру науқанының орындалуы да талқыланды. Аудан басшысы жоспардың орындалуы төмен ауылдық округтер сынға алып, салаға жауапты орынбасары мен кент, қала және ауылдық округ әкімдеріне жауапты тұлғалармен бірлесе жұмысты жандандыруды тапсырды.
Мәжіліс соңында ауданның санитарлық тазалығы, абаттандыру жұмыстары да назардан тыс қалмады. Аудан әкімі аудан орталығы мен елді мекендердегі тазалық жұмыстарын сынға алып, кемшіліктерді шұғыл жою және алдағы күндері де «Таза Қазақстан» акциясы аясында өтетін тазалық жұмыстарына белсенді қатысуға шақырды.
