Отбасылық эстафета Қазалы мәдени-демалыс кешеніндегі спорт алаңқайында Қазақстан Республикасының мемлекеттік Гимнімен басталды.
Эстафеталық сайысқа спорт саласының ардагері Бәкенов Қуанған, Әйтеке би кенттік әйелдер кеңесінің төрайымы Садуақасова Райхан және «Сауаптан құр қалмайық» қоғамдық қорының жетекшісі Қарымсақов Мақсұт қазылық жасап, Қазалы ауданының дене тәрбиесі, спорт және туризм бөлімінің 3 жаттықтырушысы төреші болды.
Эстафеталық додаға көп балалы 9 отбасы қатысып, алдымен өз командаларының ұранымен таныстырды. Одан кейін сайыскерлер 5 кезең – «Жүйрік ат», «Кім епті?», «Кім жылдам», «Допты шеңберге лақтыру», «Жеңіске жету» эстафеталары бойынша бақ сынасты. Отбасылық эстафета жанкүйерлерінің көптігінен өте тартысты өтті.
Спорт сүйер отбасылардың жетістіктерін марапаттау рәсімі мәдени кешенде мерекеге орай ұйымдастырылған салтанатты кеште қорытындыланды. Шараны аудан әкімінің орынбасары Тлеумбетов Дәурен Оңғарбайұлы сөз сөйлеп ашып, Отбасы күні мерекесінің мәні мен маңызын тілге тиек етті. Көпшілікті бүгіннен басталған «Мерейлі отбасы» ұлттық конкурсына үміткер болуға шақырды. Содан соң эстафетаға қатысушы отбасыларға алғысын білдіріп, барлықө қатысушыларға аудан басшысының марапаттарын табыстады.
Тартысты өткен сайыс нәтижесімен І орын алған Теңелбековтер отбасы (№266 мектеп-лицей) диплом және аудандық мәдениет және тілдерді дамыту бөлімінің демеушілігімен 100 мың теңге, екінші орынға ие болған Смағұловтар отбасы (204 мектеп) диплом және 70 мың теңге, ІІІ орын иегері Әбдірахмановтар отбасы (денсаулық сақтау бөлімі) диплом мен 50 мың теңге қаржылай сыйақыға ие болды.
Ал, Жандосовтар (288 мектеп), Жанқуатовтар (249 мектеп-лицей), Аманқосовтар (170 мектеп), Алуадиновтер (70 мектеп), Махановтар (мәдениет бөлімі), Наурзалиевтер (денсаулық сақтау бөлімі) отбасыларына аудан әкімінің алғыс хаты мен бағалы сыйлықтары берілді.
Мерекелік кеш аудандық мәдениет орталығы өнерпаздарының және отбасылық ансамблдердің концертіне ұласып, әуезді ән мен тәтті күй шырқалды. Шара барысы әсем ырғақты бишілердің биімен өріліп, көрермендерді ризашылыққа бөледі.
Қазалы ауданының білім және дене тәрбиесі, спорт және туризм бөліміне, Әйтеке би кенттік мәдениет үйіне, Қазалы аудандық отбасын қолдау орталығына сайысты ұйымдастыруға белсене атсалысқандары үшін зор алғысымызды білдіреміз.
Эстафетаға қатысқан барша отбасыларды жеңістерімен шын жүректен құттықтаймыз! Ұлттың болашақ спортшыларын тәрбиелеп отырған көпбалалы отбасылар шын мәнінде көпке үлгі. Мәуелі бәйтеректей жайқалып өсіп-өніп, мерейлеріңіз арта берсін! Берекесі артқан, ауызбіршілігі мығым, ынтымағы мол, табысты отбасылар қатарынан көріне беріңіздер!
15 мамыр – Халықаралық отбасы күні баршаңызға құтты болсын!
Барлығыңыздың жанұяларыңызға амандық, шаттық пен қуаныш тілейміз! Берекесі мен бірлігі жарасқан отбасылар қатары көп болсын!
