Қазалы аудан әкімінің орынбасары әскерге шақыру пунктіне барды
Бүгінгі таңда Қазалы ауданындағы қорғаныс істері жөніндегі бөлім ғимаратына күрделі жөндеу жұмыстары жүргізілуде. Аталған ғимаратқа шілде айында басталған жөндеу жұмыстары қараша айында аяқталады деп жоспарланып отыр. Жөндеу жұмыстары аясында ғимараттың сыртқы қасбеті жаңғыртылумен қатар, ішкі әрлеу жұмыстары жүргізіліп, инженерлік-коммуникациялық желілер мен жылу жүйесі толығымен қайта жаңартылуда, — деп хабарлайды «PostScript.kz» ақпараттық агенттігі
Аудан әкімінің орынбасары, әскерге шақыру комиссиясының төрағасы Дәурен Тлеумбетов аудандық қорғаныс істері жөніндегі бөлімге барып, ғимаратқа жүргізіліп жатқан жөндеу жұмыстарын көрді. Сондай-ақ қорғаныс істері бөлімінің бастығы Нұрлан Көлбаевқа жөндеу жұмыстарының сапасына аса мән беріп, мерзімінде аяқтауды бақылау қажеттігін ескертті.
Мұнан кейін Дәурен Оңғарбайұлы бөлімге қарасты әскерге шақыру пунктіне барды. Шақыру пунктінде медициналық комиссиядан өтіп жатырған әскерге шақырылушы азаматтармен және медициналық комиссияның мүшелерімен кездесті.
Шақыру пунктінде өткен кездесуде аудан әкімінің орынбасары әскерге шақырылушы азаматтарға Отан алдындағы борыштарын абыроймен атқару, жастардың бойында патриотизмді қалыптастыру және қазіргі таңда әскерге барған азаматтарға мемлекет тарапынан беріліп жатырған жеңілдіктер туралы ақпарат берді. Ал, медициналық комиссия мүшелеріне өздеріне міндеттелген жұмыстарға жауапкершілікпен қарап, сыбайлас жемқорлыққа жол бермеу мәселесін қатаң ескертті.
Айта кетейік, биыл аудан бойынша күзгі әскерге шақыру кезеңінде 96 тапсырыс беріліп отыр. Бүгінге дейін облыстық жиын пунктіне 14 азамат жөнелтіліп, оның төртеуі Отан алдындағы борышын өтеу үшін ҚР ҰҚК Шекара қызметінің әскери бөлімдеріне жөнелтілді.
