Қазалы мәдени-демалыс кешенінде ұйымдастырылған шарада өнерлі, суретші балалар өздерінің қолдан жасаған түрлі бұйымдарынан көрмелерін таныстырды.
Мерекелік шараға аудан әкімі Алмасбек Есмаханов арнайы қатысып, қазалылық бүлдіршіндерді мерекемен құттықтады.
— Президентіміз Қасым-Жомарт Кемелұлы Тоқаев: «Мемлекет балалардың жан-жақты дамуына барлық жағдайды жасай береді. Жас ұрпаққа тағылымды тәрбие, сапалы білім беріп, олардың бойына асыл қасиеттерді сіңіру – баршаға ортақ парыз. Жас ұрпақтың мықты азамат болып өсуі еліміздің тұрақты дамуына және баянды болашағына жол ашады», — деген болатын.
Ел Президентінің бастамасымен сіздердің болашақтарыңыз жарқын болуы үшін, жайлы да жақсы өмір сүрулеріңіз үшін ауқымды жұмыстар қолға алынып келеді.
Мемлекет басшысының, Үкіметтің қолдауымен, төрт жылдан астам уақыт облысымызды басқарған Нұрлыбек Машбекұлының бастамасымен өңірімізде 200-ден астам әлеуметтік нысандар бой көтерді. Президентіміздің бастамасымен қолға алынған «Келешек мектептері» ұлттық жобасы аясында өңірде 10 жаңа мектеп салынды. Физика-математика бағытындағы «Білім-инновация» лицей-интернаты, музыкалық колледж. Оқушылар сарайы, «Сыр жұлдыздары» академиясы, бірқатар аудандарда Оқушылар үйі мен Өнер мектептері пайдалануға берілді.
Жуық арада облыс орталығында Балалар тынығу лагері ашылса, бүгін мереке аясында облыс орталығында аймақ басшысы Мұрат Нәлқожаұлының қатысуымен Ботаникалық білім беру орталығы пайдалануға берілуде.
Алдағы уақытта да аймақ басшысының қолдауымен жоспарланған жұмыстар жетерлік. Өздеріңіз туған Қазалы ауданында да жыл сайын сіздер білім алатын, өнер үйренетін, шыңдалатын, шынығатын мектептер, спорт кешендері салынуда.
Мәселен, «Келешек мектептері» жобасы аясында Жанқожа батыр ауылында 300 орындық заманауи мектеп пайдалануға берілді. Ауданымызда 9 мектепке ағымдағы және күрделі жөндеу жұмыстары жүргізілді.
Жылдың басында Бекарыстан би ауылында жаңа спорт кешені пайдалануға берілсе, маусым айының ішінде Әйтеке би кенті мен Қожабақы ауылында да заманауи спорт кешендері ашылатын болады. Бұдан бөлек, биыл аудан орталығында 2 спорт алаңына жөндеу жұмыстарын жүргізсек, бүгін мереке аясында Әйтеке би кентінен 2 жаңа спорт алаңын пайдалануға бердік. Болашағымыз балаларымыз үшін жасалатын игі жұмыстар алдағы уақытта да жалғаса беретін болады. — деді аудан әкімі.
Мерекелік шарада өнерпаздар бүлдіршіндер ән шырқап, би билеп, мерекеге жиналған жұртшылыққа ерекше көңіл-күй сыйлады.
Шарада бүлдіршіндерге арналған қызықты ойындар ұйымдастырылып, түрлі ертегі кейіпкерлері балалармен бірге көңілді кеш өткізді. Арнайы батуттар құрылып, балаларға көтеріңкі көңіл-күй сыйланды.
