Комиссия төрағасы Дәурен Тілеумбетовтің төрағалығымен өткен жиынға тиісті мекеме басшылары мен комиссия мүшелері қатысты. Күн тәртібінде әлеуметтік қолдауды қажет ететін отбасылар бойынша ұсыныстар, кәмелетке толмағандар арасындағы құқық бұзушылық жағдайлары, білім беру ұйымдарынан келіп түскен ұсыныстар, құқық бұзушылықтың алдын алу бағытындағы 3 айлық қорытындысы, балалардың жазғы демалысын ұйымдастыру және қауіпсіздігін қамтамасыз ету сынды 5 мәселе қаралды.
Отырыс барысында әрбір мәселе жан-жақты талқыланып, комиссия төрағасы Дәурен Оңғарбайұлы жауапты мекемелерге нақты тапсырмалар берді. Әсіресе, тұрмысы төмен және бақылауды қажет ететін отбасылармен жұмысты күшейту, кәмелетке толмағандар арасындағы құқық бұзушылықтың алдын алу, сондай-ақ жазғы демалыс кезеңінде балалардың қауіпсіздігін қамтамасыз ету бағытында жүйелі жұмыстар жүргізу қажеттігін атап өтті.
Сонымен қатар әр балаға жеке бақылау орнату, жасөспірімдер арасындағы құқық бұзушылықтың алдын алу үшін тұрақты рейдтік шараларды жалғастыру, бала қауіпсізідігі бағытында ата-аналардың жауапкершілігін арттыру бағытында түсіндіру жұмыстарын жандандыруды айтып, әрбір берілген тапсырмалардың орындалуы қатаң бақылауда болатынын ескертті.
