Көпшілік екі жыл бұрын баспанамыздың іргетасын құйып, әрі қарай қабырғаларын қалайтын кірпішті қала шетіндегі кәсіпорыннан сатып алуға келіскенбіз дейді. Тіпті бір жапырақ келісім-шартқа сеніп, кәсіпкердің қолына толық төлемді санап бергендерін айтады. Бірақ әне-міне құрылыс материалын жеткіземіз деп сендірген зауыт басшысын ақыр соңы таба алмай қалдық деп ашулы сатып алушылар.
Менің өзім 1 млн 400 мың теңге бердім 30 мың қышқа. Алдымыз 2,2 млн теңге төлеген. 865 мың теңге бергендер де бар. Содан бері уже мен неше рет келдім кірпіш те жоқ, не ақшам да жоқ,- дейді өңір тұрғыны Достияр Сейтжаппаров.
Қазір де зауытта бірде-бір жұмысшы жоқ. Яғни кәсіпорынның қызметі тоқтаған.
Қомақты қаражатты қалтасына басқан кәсіпкерді үміт үзген тұрғындар амалсыз сотқа жүгінген. Судья азаматтық тәртіп бойынша сатып алушылардың ақшасын қайтару керек деген шешім шығарыпты. Десе де, сот орындаушылары қауқарсыз болып отыр деп күйінеді көпшілік.
Сот орындаушыға бергенімізге менің өзіме 7 ай болды. Сот орындаушылардың үстінен де шағымданбаған жерім қалмады. Бірақ нәтиже жоқ. Заң жұмыс істемейді біздің елде. Ешқандай хабарласпайды, я жазбайды. Біз жазсақ ЖСН сұрайды болды,-дейді тұрғын Елжас Кенжеәлиев.
Кірпіш шығаратын кәсіпорын иесімен біз де байланыса алмадық. Ал Әділет департаменітінің өкілдері сот орындаушылар заң шеңберінде жұмыс істеп жатыр дейді.
Жеке сот орындаушылармен аталған заң талаптарына сәйкес мәжбүрлеп орындау шаралары қабылданып, яғни жауапкершілігі шектеулі серіктестің есеп-шоттарына тыйым салу, инкассалық өкім қою секілді басқа да мәжбүрлеп орындау шаралары жүргізіліп жатыр, — деп жауап берді департаменттің бөлім басшысы Жандос Абсат.
PS.Яғни сот кәсіпкердің өзін емес, оған тиесілі компанияны борышкер деп таныған. Сондықтан тек серіктестіктің атындағы мүліктерді ғана бұғаттай аламыз дейді жауаптылар. Ал, сан соғып қалған көпшілік зауыт иесін жауапқа тартуды талап етеді.
