Мұнда депутаттар мен жауапты министрліктердің өкілдері су тапшылығы мәселесін шешу үшін екі іргелі құжатты сөз етті. Олар – Жаңа Су Кодексі және Үкімет қабылдаған су ресурстарын басқару жүйесін дамытудың 2030 жылға дейінгі тұжырымдамасы. Су ресурстары және ирригация министрлігі су кодексін өзектендіруде Германияның тәжірибесіне назар аударған көрінеді. Парламент Мәжілісіне енгізілген құжаттың жаңа нұсқасында суды сарқылудан, ластанудан және қоқыстанудан қорғауға басымдық беріледі екен. Ал ресурстың өзі енді тек экономикалық пайда көзі ретінде қарастырылмайды. Отырыста алғаш сөз алған облыс әкімі Нұрлыбек Нәлібаев су жаңнамаларына өзгерістер ауадай қажет екендігін айтты.
Қазіргі қолданыстағы су кодексі 20 жыл бұрын қабылданған. Уақыт талабына сай су заңнамасы одан әрі қарай жетілдіруді талап етеді. Мемлекет басшысы 2022 жылы Үкіметке климаттың өзгеруі мен шекаралас елдердің саясатын ескеретін жаңа су кодексін әзірлеуді тапсырды. Бұл құжат еліміздегі су ресурстары тапшылығын азайтуға бағытталған. Жаңа су кодексінің қабылдануы Сыр өңірінің экологиялық қажеттіліктерін қанағаттандыруға мол мүмкіндік береді.
деді НҰРЛЫБЕК НӘЛІБАЕВ, ҚЫЗЫЛОРДА ОБЛЫСЫНЫҢ ӘКІМІ.
