Мерекелік іс-шара аясында аудан орталығында этнос өкілдерінің мәдени көрмесі ұйымдастырылып, онда түрлі ұлттардың салт-дәстүрі, ұлттық киімдері мен қолөнер бұйымдары көпшілік назарына ұсынылды. Көрмеге жиналған тұрғындар әр халықтың мәдени ерекшеліктерімен танысып, рухани бай мұралардан тағылым алды. Аудан әкімі Айтбай Жандарбеков көрмені аралап, этнос өкілдерінің өнері мен еңбегіне жоғары баға берді.
Салтанатты жиында сөз алған аудан басшысы тұрғындарды 1 мамыр – Қазақстан халқының бірлігі күні мерекесімен құттықтап, еліміздегі тұрақтылық пен қоғамдық келісімнің маңыздылығына тоқталды. Ол өз сөзінде бейбітшілік пен татулықтың ел дамуының басты негізі екенін атап өтті.
Сонымен қатар, аудан әкімі ел бірлігін нығайтуда Қазақстан халқы Ассамблеясының айрықша рөл атқаратынын тілге тиек етіп, Мемлекет басшысы Қасым-Жомарт Кемелұлы Тоқаевтың: «Бейбітшілік пен келісім – біздің басты құндылығымыз. Бұл – Қазақстанды алға бастайтын қуатты күш» деген сөзін келтірді. Бұл ойлар мерекенің мән-маңызын тереңдете түсіп, көпшілікке үлкен ой салды.
Іс-шара соңы әсерлі концерттік бағдарламаға ұласты. Жергілікті өнерпаздар мен түрлі этнос өкілдері сахнада ұлттық әндер мен билерін орындап, көрермендердің ыстық ықыласына бөленді. Әр ұлттың мәдениеті мен өнері тоғысқан бұл кеш достық пен бірліктің символына айналды.
Айта кету керек, мұндай мерекелік шаралар қоғамдағы өзара түсіністік пен сыйластықты нығайтуға, жас ұрпақты елжандылық пен патриоттық рухта тәрбиелеуге үлкен үлес қосады.
Жалпы, Бірлік күніне арналған мерекелік шаралар шиеліліктер үшін ерекше әсерлі өтіп, көпшіліктің жүрегінде жылы естелік қалдырды. Бұл күн тағы бір мәрте ел бірлігі мен татулығының баға жетпес құндылық екенін айқындады.
Шиелі ауданы әкімдігінің баспасөз қызметі
