Бүгінгі күнге дейін улау жұмыстары ауданға қарасты бірқатар елді мекендерде толық аяқталды. Атап айтқанда, Ы. Жахаев, Майлытоғай, Байсын, Бидайкөл және Жөлек ауылдарында кенеге қарсы залалсыздандыру шаралары жүргізіліп, тиісті жұмыстар сапалы түрде орындалды. Мамандардың айтуынша, бұл бағыттағы жұмыстар кезең-кезеңімен жалғасып, ауданның басқа да елді мекендерін қамтитын болады.
Кене – адам мен мал денсаулығына айтарлықтай қауіп төндіретін жәндік. Сондықтан оның таралуының алдын алу үшін улау жұмыстарын уақытылы әрі сапалы жүргізудің маңызы зор. Осыған байланысты аудан тұрғындарына қора-жайларын таза ұстау, санитарлық талаптарды сақтау қажеттігі ескертіледі.
Мамандардың мәліметінше, кенелер көбіне қозғалмайтын ақырлардың астында, мал азығына арналған ыдыстар мен баллондардың түбінде, сондай-ақ кесек қуыстары мен қараңғы, ылғалды жерлерде жиі шоғырланады. Осы себепті улау жұмыстары жүргізілген кезде тұрғындардың белсенділік танытып, мамандармен бірлесе жұмыс істеуі маңызды.
Сондай-ақ үй жануарларын да дер кезінде залалсыздандырып, қора-жайларды толық өңдеуден өткізу қажет. Бұл өз кезегінде кененің таралуының алдын алып, тұрғындардың және мал шаруашылығының қауіпсіздігін қамтамасыз етеді.
Кенеге қарсы улау жұмыстары алдағы уақытта да жалғасын табады. Тұрғындарды аталған шараларға түсіністікпен қарап, белсенді қатысуға шақырамыз.
