Кеңейтілген форматта ұйымдастырылған отырыста азаматтық қоғам өкілдері белсенділік танытып, отбасылық құндылықтарды нығайту, әйелдердің қоғамдағы рөлін арттыру, сондай-ақ демографиялық саясатты жетілдіру бағытында өз ұсыныстарын ортаға салды. Қатысушылар тарапынан айтылған пікірлер комиссия жұмысының тиімділігін арттыруға серпін беретіні атап өтілді.
Жиын барысында аудан көлемінде отбасылық және гендерлік саясатты жүзеге асыру бағытында атқарылып жатқан жұмыстар жан-жақты қаралды. Әсіресе, тұрмыстық зорлық-зомбылықтың алдын алу, ана мен бала құқығын қорғау, көпбалалы және аз қамтылған отбасыларды қолдау мәселелері кеңінен қозғалды. Сала мамандары осы бағыттағы атқарылған жұмыстар бойынша баяндама жасап, кездесіп отырған түйткілді мәселелерді де жасырмай жеткізді.
Сонымен қатар, құқық қорғау органдары мен әлеуметтік қызметтер арасындағы өзара іс-қимылды күшейту, профилактикалық жұмыстарды жандандыру, ақпараттық-түсіндіру шараларын көбейту қажеттігі айтылды. Жастар арасында отбасылық құндылықтарды насихаттау, ерте некенің алдын алу, әйелдердің құқықтық сауаттылығын арттыру мәселелері де назардан тыс қалған жоқ.
Отырыс қорытындысында көтерілген барлық ұсыныс-пікірлер ескеріліп, нақты хаттамалық тапсырмалар бекітілді. Тиісті сала басшыларына алдағы уақытта атқарылатын жұмыстардың жоспары жүктеліп, олардың орындалуын тұрақты бақылауда ұстау тапсырылды. Комиссия алдағы кезеңде де осы бағыттағы жұмыстарды жүйелі түрде жалғастыратыны атап өтілді.
