Таңғы уақытта аудан тұрғындары, мемлекеттік қызметшілер, білім беру, денсаулық сақтау және өзге де сала өкілдері бір мезетте сап түзеп, еліміздің басты мемлекеттік нышандарының бірі – Мемлекеттік гимнді ерекше мақтанышпен орындады. Елдің бірлігі мен тәуелсіздігін дәріптейтін бұл шараға қатысушылар Отанға деген сүйіспеншіліктерін білдіріп, мемлекеттік рәміздерге деген құрметтерін көрсетті.
Мемлекеттік рәміздер күні – Қазақстан халқы үшін ерекше маңызға ие мереке. Өйткені Ту, Елтаңба және гимн – еліміздің егемендігі мен тәуелсіздігінің, ұлттық бірлігі мен мемлекеттілігінің айқын белгісі. Осы құндылықтарды ұлықтауға бағытталған іс-шаралар жас ұрпақтың бойында патриоттық рухты қалыптастырып, туған елге деген мақтаныш сезімін арттыруға ықпал етеді.
Шиелі ауданында өткен шара барысында қатысушылар мемлекеттік рәміздердің тарихи мәні мен маңызына тоқталып, олардың тәуелсіз Қазақстанның қалыптасу жолындағы ерекше рөлін атап өтті. Сондай-ақ мемлекеттік рәміздерді құрметтеу – әрбір азаматтың парызы әрі ел болашағына деген жауапкершілігінің көрінісі екені айтылды.
Бүгінде мемлекеттік рәміздер халқымыздың бірлігі мен татулығын нығайтып, Қазақстанның әлемдік қауымдастықтағы беделін танытатын маңызды құндылықтардың бірі болып саналады. Сондықтан оларды дәріптеу мен құрметтеу бағытындағы жұмыстар жүйелі түрде жалғасып келеді.
Мемлекеттік гимнді бір мезетте орындау арқылы шиеліліктер елдік рухтың, отансүйгіштік пен ұлттық құндылықтарға деген құрметтің жоғары деңгейде екенін тағы бір мәрте дәлелдеді. Бұл игі бастама аудан тұрғындарының тәуелсіз еліміздің жетістіктеріне деген мақтанышын арттырып, қоғамдық бірлік пен ынтымақты нығайтуға өз үлесін қосты.
Көк байрағымыз көкте мәңгі желбіреп, қасиетті Елтаңбамыздың абыройы асқақтай берсін! Қазақстан Республикасының Мемлекеттік гимні Тәуелсіздігіміздің мәңгілік үні ретінде әрдайым шарықтай бермек.
Шиелі ауданы әкімінің баспасөз қызметі.
