Мәжіліске аудандық мәслихат төрағасы, аудан әкімінің орынбасарлары, «AMANAT» партиясы аудандық филиалының атқарушы хатшысы, дербес бөлім басшылары, сондай-ақ кент және ауылдық округ әкімдері қатысты.
Күн тәртібіндегі негізгі мәселе ретінде ауданда туризм саласын дамыту бағытындағы жұмыстар қаралды.
Ауданымызда туристерді қызықтыратын тарихи-мәдени нысандар мен демалыс орындары бар. Атап айтқанда, Еңбекші ауылдық округіне қарасты Қаратау жотасындағы «Бала Сауысқандық» шатқалында орналасқан тасқа қашалған көне суреттер (петроглифтер) мен еліміздің рухани-тарихи мұраларының бірі саналатын «Оқшы ата» кесенесі өңірдің туристік әлеуетін арттыруға мүмкіндік береді. Сонымен қатар, Бәйгеқұм ауылдық округіндегі «Ханқожа» көлінің жағалауында жазғы маусымда жеке кәсіпкерлер ұйымдастырған демалыс орындары тұрғындар мен қонақтарға ақылы қызмет көрсетуде.
Туризмді дамыту мәселелері жөнінде аудандық дене тәрбиесі, спорт және туризм бөлімінің басшысы Беркінбай Ермағанбетов баяндама жасап, саладағы атқарылып жатқан жұмыстар мен алдағы кезеңге жоспарланған міндеттерге тоқталды. Сондай-ақ, ауданның туристік әлеуетін тиімді пайдалану, инфрақұрылымды жетілдіру және туристік нысандарды кеңінен насихаттау бағытында бірқатар ұсыныстарын жеткізді.
Сонымен қатар, мәжіліс барысында үш қосымша мәселе қаралды.
2026 жылдың ІІ жартыжылдығына мерзімді басылымдарға жазылу барысы және әлеуметтік желілердегі ақпараттық жұмыстардың белсенділігі туралы аудандық қоғамдық даму бөлімінің басшысы Кенжехан Есенбаев хабарлама жасап, аудан аумағындағы жазылым науқанының орындалу деңгейі мен мемлекеттік мекемелердің әлеуметтік желілердегі ақпараттық белсенділігіне тоқталды.
Жұмыс берушілер мен жұмыскерлер арасындағы еңбек қатынастары мәселесі бойынша аудандық жұмыспен қамту және әлеуметтік бағдарламалар бөлімінің басшысы Ағыбай Төлегенов баяндама жасап, еңбек заңнамасының сақталуы, еңбек дауларының алдын алу және әлеуметтік әріптестікті нығайту бағытында атқарылып жатқан жұмыстар жөнінде мәлімет берді.
Ал көлік салығының орындалуы және мейрамханалар мен кәсіпкерлік нысандарын қайта бағалау жұмыстары туралы аудандық мемлекеттік кірістер басқармасының басшысы Еркеғали Абдрахманов баяндап, салық түсімдерінің орындалу барысы мен салық базасын кеңейту бойынша жүргізіліп жатқан жұмыстарға тоқталды.
Мәжіліс қорытындысында аудан әкімі Айтбай Жандарбеков көтерілген мәселелер бойынша тиісті сала басшылары мен кент және ауылдық округ әкімдеріне нақты тапсырмалар беріп, олардың орындалуын тұрақты бақылауда ұстауды тапсырды.
@Шиелі ауданы әкімінің баспасөз қызметі.
