Жиынға аудан әкімінің орынбасарлары, дербес бөлім басшылары, сондай-ақ кент және ауылдық округ әкімдері қатысты. Мәжіліс барысында әр сала бойынша жауапты тұлғалар атқарылған жұмыстар мен алдағы жоспарлар жөнінде баяндама жасап, өз бағыттары бойынша негізгі көрсеткіштерге тоқталды.
Аудан әкімі Ардақ Ибраимов өз сөзінде инклюзивті саясатты жүзеге асырудың маңыздылығына ерекше назар аударып, бұл бағыттағы жұмыстардың жүйелі түрде жүргізілуі қажеттігін атап өтті. Оның айтуынша, қоғамның барлық мүшелеріне тең мүмкіндік жасау – мемлекеттік саясаттың басты бағыттарының бірі. Осы ретте мүмкіндігі шектеулі азаматтарды қолдау, оларды жұмыспен қамту, әлеуметтік ортаға бейімдеу мәселелері басты назарда болуы тиіс екені айтылды.
Сонымен қатар, кәсіпкерлікті дамыту мәселесі де кеңінен қозғалды. Аудан басшысы шағын және орта бизнесті қолдау арқылы экономиканың тұрақты өсуіне қол жеткізуге болатынын атап өтіп, кәсіпкерлерге қолайлы жағдай жасау, мемлекеттік бағдарламалардың тиімділігін арттыру және инвестиция тарту жұмыстарын күшейтуді тапсырды. Бұл бағытта әрбір ауылдық округ әкімдері нақты нәтижеге жұмыс істеуі қажеттігі ескертілді.
Мәжілісте макроэкономикалық көрсеткіштердің орындалу барысына да ерекше мән берілді. 2026 жылдың алғашқы үш айының қорытындысы бойынша ауданның негізгі экономикалық көрсеткіштерінде оң өсім қалыптасқаны айтылды. Атап айтқанда, өнеркәсіп өнімдерін өндіру көлемі 24,6 пайызға артып, жалпы 8 355,0 млн теңгенің өнімі өндірілген. Бұл көрсеткіш аудан экономикасының тұрақты дамып келе жатқанын айғақтайды.
Жиын соңында аудан әкімі күн тәртібінде қаралған мәселелер бойынша жауапты сала басшылары мен кент және ауылдық округ әкімдеріне нақты міндеттер жүктеді. Әр тапсырманың орындалу мерзімі белгіленіп, бақылауға алынатыны ескертілді. Сондай-ақ, алдағы уақытта да көрсеткіштердің төмендеуіне жол бермей, барлық бағытта жүйелі жұмысты жалғастыру қажеттігі атап өтілді.
Мәжіліс қорытындысымен қаралған мәселелер бойынша жауапты тұлғаларға хаттамалық тапсырмалар беріліп, олардың сапалы әрі уақытылы орындалуы қатаң бақылауда болатыны жеткізілді.
