Жұма күні өткен кездесуге ауыл тұрғындары, сала басшылары мен округ әкімдігі өкілдері қатысып, елді мекеннің әлеуметтік-экономикалық дамуы, инфрақұрылымдық мәселелер және алдағы жоспарлар кеңінен талқыланды. Кездесу барысында аудан басшысы Мемлекет басшысы мен Үкіметтің қолдауымен ауданда жүзеге асырылып жатқан ауқымды жобаларға тоқталып, өңірдің даму көрсеткіштері жөнінде жан-жақты баяндама жасады.
Аудан әкімі өз сөзінде халықтың тұрмыс сапасын жақсарту, ауылдық елді мекендердің инженерлік инфрақұрылымын дамыту, абаттандыру және санитарлық тазалық жұмыстарын күшейту бағытындағы жобалар кезең-кезеңімен жалғасатынын атап өтті. Сонымен қатар, әлеуметтік саланы дамыту, кәсіпкерлікті қолдау және ауыл шаруашылығы бағытындағы бастамаларға да ерекше назар аударылып отырғанын жеткізді.
Кездесу барысында Жаңатұрмыс ауылдық округінде атқарылған жұмыстарға кеңінен тоқталынды. Атап айтқанда, Байсын ауылына келетін «Әлімұса» каналының 2 шақырым аумағы қайыр басқан топырақтан тазартылып, нәтижесінде ауыл тұрғындары аяқ сумен тұрақты әрі кедергісіз қамтамасыз етілуде. Бұл жұмыстар егістік пен бау-бақша шаруашылығын дамытуға оң әсерін тигізіп отырғаны айтылды.
Сондай-ақ, ауыл тұрғындарын кәсіпкерлікке баулу және табысын арттыру мақсатында жүзеге асырылып жатқан «Бизнес Бастау» және «Ауыл аманаты» жобалары аясында жүйелі түсіндірме жұмыстары жүргізілуде. Биылғы жылдың алғашқы төрт айының қорытындысымен «Ауыл аманаты» бағдарламасы арқылы 3 ауыл тұрғыны жалпы көлемі 19 млн 600 мың теңге болатын жеңілдетілген несиеге қол жеткізген. Бұл қаржы ауыл тұрғындарының жеке кәсібін дамытуына және жаңа жұмыс орындарын ашуына мүмкіндік бермек.
Бұдан бөлек, округте балық шаруашылығын дамыту бағытында да нақты жобалар қолға алынуда. Қазіргі таңда құны 34 млн 600 мың теңгені құрайтын кооператив жобасын іске асыру бойынша тиісті жұмыстар жүргізілуде. Жоба жүзеге асқан жағдайда ауылдағы кәсіпкерлік әлеует артып, жаңа өндіріс көздері қалыптасады деп күтілуде.
Кездесу барысында округтегі инфрақұрылымдық мәселелер де назардан тыс қалмады. Атап айтқанда, аяқ су жүйесін реттеу, ауылішілік жолдарды жөндеу, санитарлық тазалықты сақтау және елді мекендерді көркейту бағытындағы жұмыстар тұрақты бақылауда екені айтылды. Сонымен қатар, аудан әкімі алдағы уақытта да ауылдардың әлеуметтік жағдайын жақсартуға бағытталған жобалар жалғасатынын жеткізді.
Жиын соңында тұрғындар өздерін толғандырған мәселелер мен ұсыныстарын ортаға салып, ауылдың әлеуметтік-экономикалық дамуына қатысты пікірлерін білдірді. Аудан әкімі халық тарапынан көтерілген әрбір мәселе назардан тыс қалмайтынын айтып, оларды кезең-кезеңімен шешу бағытында нақты жұмыстар жүргізілетінін атап өтті.
@Шиелі ауданы әкімінің баспасөз қызметі.
