Қазіргі таңда қорғаныс істері жөніндегі бөлімде азаматтарды күзгі мерзімді әскери қызметке қабылдауға дайындау жұмыстары жүргізілуде. Әскерге шақырылатын азаматтар белгіленген тәртіпке сәйкес медициналық тексеруден өтіп, олардың денсаулық жағдайы мен әскери қызметке жарамдылығы анықталуда. Сонымен қатар құжаттарды рәсімдеу, шақырылушыларды жинақтау және әскери бөлімдерге жөнелту жұмыстары жүйелі түрде ұйымдастырылған.
Аудан әкімі әскерге шақыру пунктіндегі арнайы кабинеттерді аралап, азаматтарды қабылдау барысымен танысты. Жауапты мамандардан атқарылып жатқан жұмыстар туралы ақпарат алып, шақырылушыларға қажетті жағдай жасау, медициналық тексерудің сапалы әрі талапқа сай өткізілуі маңызды екенін атап өтті.
Айта кетейік, қорғаныс істері жөніндегі бөлімнің материалдық-техникалық базасын жақсарту мақсатында ғимаратқа өткен жылы 188 млн теңге көлемінде жөндеу жұмыстары жүргізілген. Жөндеу барысында нысанның сыртқы қасбеті жаңғыртылып, ішкі әрлеу жұмыстары толықтай атқарылды. Сонымен бірге инженерлік-коммуникациялық желілер мен жылу жүйесі қайта жаңартылып, ғимараттың жалпы жағдайы жақсартылды.
Биыл Қазалы ауданы бойынша күзгі мерзімді әскерге шақыру науқаны аясында 58 азаматты әскери қызметке жөнелту жоспарланып отыр. Бүгінгі күнге дейін олардың 39-ы облыстық жиын пунктіне жіберілген. Оның ішінде 19 азамат Отан алдындағы азаматтық борышын өтеу үшін Қазақстан Республикасы Ұлттық қауіпсіздік комитеті Шекара қызметінің әскери бөлімдері мен Ұлттық ұлан сапына жөнелтілді.
Әскерге шақыру науқаны кезінде жас азаматтардың құқықтары мен міндеттерін түсіндіру, олардың медициналық тексеруден толық өтуін қамтамасыз ету және әскери қызметке жөнелту жұмыстарын талапқа сай ұйымдастыруға ерекше мән берілуде.
Аудан әкімі қорғаныс істері жөніндегі бөлімдегі жұмыс барысымен танысқаннан кейін Қазалы жедел жәрдем станциясына барды. Мұнда аудан басшысына станцияның күнделікті қызметі, медициналық қызметкерлердің еңбек жағдайы, материалдық-техникалық базасы және тұрғындарға жедел медициналық көмек көрсету сапасы жөнінде баяндалды.
Қазіргі таңда Қазалы жедел жәрдем станциясында 99 қызметкер еңбек етеді. Станцияның қарамағында 9 санитарлық автокөлік бар. Тұрғындарға тәулік бойы жедел медициналық көмек көрсету үшін күндізгі ауысымда 4, ал түнгі ауысымда 5 жедел жәрдем бригадасы қызмет атқарады.
Жедел жәрдем қызметінің негізгі міндеті – тұрғындардың шақыртуына уақытылы жетіп, науқасқа алғашқы медициналық көмекті шұғыл көрсету. Осы ретте бригадалардың үздіксіз әрі тиімді жұмыс істеуі, санитарлық автокөліктердің техникалық жағдайы және медицина мамандарының еңбек етуіне қолайлы жағдайдың жасалуы маңызды.
