Салтанатты жиында сөз сөйлеген аймақ басшысы коммуналдық сала мамандарын құттықтап, олардың қаланың тазалығы мен тұрғындардың жайлы өмір сүруіне қосып отырған еңбегіне жоғары баға берді.
Өз сөзінде облыс әкімі Мемлекет басшысы Қасым-Жомарт Тоқаевтың «Тазалық әр адамнан, әр үйден, әрбір көше мен әр қаладан басталуы керек. Өйткені, «Таза Қазақстан» – бір күндік науқан емес. Бұл – біздің өмір салтымыз» деген тұжырымын атап өтіп, өңірде осы бастама аясында кешенді жұмыстар жүйелі жүргізіліп жатқанын айтты.
– Президентіміздің бастамасымен қолға алынған «Таза Қазақстан» бағдарламасы бүгінде өңірдің экологиялық мәдениетін қалыптастырудың маңызды тетігіне айналды. Қызылорда қаласы мен елді мекендерде санитарлық тазалықты сақтау, абаттандыру және көгалдандыру бағытындағы жұмыстар үздіксіз жүргізілуде. Бұл іске тұрғындар, еріктілер, қоғамдық ұйымдар мен еңбек ұжымдары белсенді атсалысып келеді. Соның нәтижесінде Сыр өңірі тазалық пен бірліктің жарқын үлгісін көрсетіп отыр. Бұл – ортақ жауапкершілік пен қоғамдық мәдениеттің көрінісі, – деді Мұрат Нәлқожаұлы.
Аймақ басшысы қазіргі таңда коммуналдық саланы жаңғырту тек техникаларды жаңартумен ғана шектелмейтінін атап өтті. Бүгінде қызмет көрсету сапасын арттыру үшін цифрлық технологиялар мен заманауи басқару құралдарын енгізу кезең-кезеңімен жүзеге асырылып келеді. Арнайы техникалардың жаңаруы коммуналдық қызметтердің жедел әрекет ету мүмкіндігін кеңейтіп, қала көшелерін күтіп ұстау, қатты тұрмыстық қалдықтарды уақытылы шығару, инженерлік желілерге қызмет көрсету және төтенше жағдайлардың алдын алу жұмыстарын анағұрлым тиімді ұйымдастыруға мүмкіндік береді.
Рәсім барысында облыстық ардагерлер кеңесінің төрағасы Серік Дүйсенбаев сөз сөйлеп, «Таза Қазақстан» бағдарламасының өңірдегі маңызына тоқталды. Сонымен қатар қаланың тазалығы мен көркеюіне сүбелі үлес қосып жүрген бірқатар коммуналдық сала қызметкерлеріне облыс әкімінің Алғыс хаттары табысталды.
Салтанатты шарада коммуналдық мекемелерге берілген 37 арнайы техниканың 32-сі «Қызылорда тазалығы» мекемесінің теңгеріміне өтті. Оның ішінде 15 қатты тұрмыстық қалдықтарды тасымалдауға арналған арнайы көлік, 5 қысқы және жазғы маусымда пайдаланылатын әмбебап коммуналдық техника және көшелерді тазалауға арналған 12 арнайы техника бар.
Ал «Қызылорда су жүйесі» мекемесінің автопаркі вакуумдық ассенизаторлармен және жылжымалы жөндеу техникаларымен толықтырылды. Бұл жаңа техникалар инженерлік желілердегі апаттық жағдайларға жедел ден қоюға, су және кәріз жүйелеріне қызмет көрсету сапасын арттыруға, сондай-ақ тұрғындарға көрсетілетін коммуналдық қызметтердің тиімділігін еселеуге мүмкіндік береді.
Мамандардың айтуынша, жаңа техникалардың пайдалануға берілуі коммуналдық қызметтердің өндірістік қуатын арттырып қана қоймай, жұмыс процестерін автоматтандыру мен цифрлық бақылау жүйелерін кезең-кезеңімен енгізуге де негіз қалайды. Бұл өз кезегінде қалалық инфрақұрылымды басқарудың тиімділігін арттырып, қызмет көрсету уақытын қысқартуға және ресурстарды ұтымды пайдалануға ықпал етеді.
Соңғы жылдары облыста барлық саланы материалдық-техникалық тұрғыдан жаңғыртуға ерекше көңіл бөлініп келеді. Қоғамдық көлік паркі жаңа автобустармен толықтырылып, мектеп оқушыларын тасымалдауға арналған көліктер сатып алынды. Денсаулық сақтау саласы жаңа жедел жәрдем көліктерімен қамтамасыз етілсе, орман шаруашылығы, ветеринария және құқық қорғау органдарының материалдық базасы да жаңа қызметтік автокөліктермен нығайтылды.
Коммуналдық шаруашылықты жаңғырту жұмыстары да тұрақты жалғасуда. Соңғы төрт жыл ішінде облыстық бюджеттен 3,1 миллиард теңге бөлініп, қалалық коммуналдық қызметтердің жұмысына қажетті заманауи үлгідегі 82 арнайы техника сатып алынған.
Бұл жұмыстардың барлығы өңірдегі коммуналдық инфрақұрылымды жаңғыртуға, қаланың санитарлық тазалығын жаңа деңгейге көтеруге және цифрлық технологияларға негізделген тиімді коммуналдық басқару жүйесін қалыптастыруға бағытталған маңызды қадам болып саналады.
