Құрылтайдың басты ерекшелігі – қоғамдағы түрлі пікірлер мен ұсыныстарды ортақ талқылауға шығарып, елдің даму бағытына қатысты өзекті мәселелерді көтеруге мүмкіндік беруінде. Халықтың ұсынысы мен азаматтардың ой-пікірі ескерілген жағдайда ғана қоғамдық диалогтың тиімділігі арта түседі.
Сайлау – азаматтың өз таңдауын жасауына берілген мүмкіндік қана емес, сонымен бірге жауапкершілік. Әрбір азамат өзінің дауыс беру арқылы елдің қоғамдық өміріне белгілі бір деңгейде ықпал ететінін түсінуі қажет. Сондықтан сайлауға немқұрайлы қарамай, кандидаттардың ұстанымы мен қоғамдық бастамаларына назар аудару – саналы азаматтың міндеті.
Бүгінде қоғамға белсенді, жауапкершілігі жоғары, ел мүддесін жеке мүддеден жоғары қоятын азаматтар қажет. Құрылтай құрамына сайланатын өкілдер де халықтың мұң-мұқтажын, ұсынысы мен талабын жеткізе алатын, қоғамдық мәселелерді шешуге үлес қоса алатын тұлғалар болғаны маңызды.
Әсіресе жастардың қоғамдық-саяси үдерістерге белсенді қатысуы – уақыт талабы. Себебі бүгінгі жастар – елдің ертеңгі дамуына жауап беретін буын. Олардың қоғамдық мәселелерге араласуы, өз пікірін ашық білдіруі және азаматтық жауапкершілік танытуы қоғамның жаңғыруына оң әсер етеді.
Құрылтай сайлауы – елдік мәселелерге бейжай қарамайтын әр азамат үшін маңызды мүмкіндік. Өз таңдауын жасау арқылы әр тұрғын қоғамдық дамуға өз үлесін қоса алады.
Сондықтан сайлауға қатысу – азаматтық белсенділіктің ғана емес, ел болашағына деген жауапкершіліктің де белгісі. Саналы таңдау мен белсенді азаматтық ұстаным – қоғамның тұрақты дамуының берік негізі.
