Ерекше балаларды тәрбиелейтін “Жас ұрпақ” балабақшасында болған жағдай бейнебақылау камерсына түсіп қалған. Видеода түскі мезгілде тәрбиешілердің еденде демалып жатқаны көрінеді. Сол сәтте кереуетте жатқан 5 жасар Әлихан Аманбай мазасынданып, қозғала бастайды. Ал тәрбиеші өзі дұрыс тыныға алмағанына ашуланды ма, әйтеуір бүлдіршінді көтеріп алып жерге құлатады.
Әлиханның анасы тәрбиешілер аутизмге шалдыққан баламды еденге лақтырып, әрі қарай түк болмағандай өздері ұйықтап жатқан деп ашулы.
— Камераны ашқан кезде тәрбиешінің баланы алып, жерге лақтырғанын көремін. И артынан тағы соққы бергенін көремін. Артынша ешқандай көмек көрсетпеген балаға. Тәрбиешілер әрі қарай ұйықтап жатыр. Баланың мұрыны қанап жатыр. Оны шалқасынан жатқызып, ұйықтатып тастаған. Қан миға кетіп қалса, өліп кетуі де мүмкін ғой — дейді Әлиханның анасы ҰЛБОЛСЫН МҮСЛІМ.
Болған жағдайды ести сала, бірнеше ата-ана полицияға шағымданған. Айтуларынша әртүрлі диагнозы бар өзге бүлдіршіндер де бұған дейін балабақшадан денелері көгеріп, тіпті бірінің қолы сынып келген жағдай болыпты. Яғни ерекше балаларды қатал тәрбиешілер таяқпен тәрбиелеп жүрген деп күдіктенеді ата-аналар.
— Менің баламның бірде білегі, тізесі, одан соң жамбасы мен арқасы көгеріп келді. Бірақ тәрбиешілер барлығына баланың өзі құлады деп жауап беріп жүрді. Біз мына жағдайдан кейін оған сенбейміз. Мүмкін өздері ұрған шығар. Оның үстіне тек біз бір ғана видеоны көріп отырмыз. Тіпті дұрыс тамақ бермегендіктен балаларымыз үйге аш болып келеді — деп шағымданды тағы бір ата-ана АЛЕКСАНДРА МҰХАМЕТЖАНҚЫЗЫ.
Ата-аналар балаларға тоймайтындай ас берілетінін де бейнекамераға жазылған видеодан көрген. Онда 8 бүлдіршінге 3 тәрелке ғана тамақ беріліп, ал тәрбиешілердің өздері телефонға телміріп отырғаны көрінеді. Ал балабақша басшысы қызметкердің 5 жасар Әлиханға күш көрсеткенін растағанымен, ас мәзірі талапқа сай деп ақталады.
— Негізі осындай жағдай бірінші рет болып жатыр. Біз қалай білдік, бүкіл органдарға камераның бәрін предоставить еттік. С нашей сторны бәрі прозрачно. Ол видеода столдың үтсінде қасықтары да жоқ, тек үш тарлека тұр. Демек, патноспен тасып жатқан кезін ата-аналар көрді. Дәл сол моментте полный көрсетейін десем, свет өшіп қалды — деп жауап берді РАУШАН ПІРІМЖАНОВА, «ЖАС ҰРПАҚ» КОРРЕКЦИЯЛЫҚ БАЛАБАҚШАСЫНЫҢ МЕҢГЕРУШІСІ.
Яғни меңгеруші өзге ата-аналардың балаларамызды ұрды деген шағымын жоққа шығарады. Ал аутизмге шалдыққан баланы еденге құлатқан тәрбиеші мен оның көмекшісі жұмыстан шығарылған. Қазір полиция “кәмелетке толмаған балаларды тәрбиелеу міндеттерін орындамау” бабымен іс қозғады.
